Бат-Үүл "хэрэгт оров"

2008/08/18
Share |
Хүмүүс: Э Бат-Үүл | 
Бат-Үүл "хэрэгт оров"

Өнгөрсөн долоо хоногт манай орны улс төрийн амьдралд бодитой ахиц гарсангүй. Харин найдлага төрүүлсэн сэжүүр цөөнгүй байлаа.

ДАВАА. Бээжингийн олимпийн нээлтэд оролцсон Ерөнхийлөгч маань энэ өдрийн өглөө эх орондоо ирэв. Улс төрийн амьдрал ч түүнийг хүлээж байсан гэхэд болно. Энэ өдөр МАХН-ынхан Төрийн ордон дотуур нэлээн хөдөлгөөнтэй, эхлээд Ц.Нямдоржийн өрөөнд, дараа нь Ерөнхий сайдын өрөөнд цуглаж байв. МАХН-ын зөвшилцлийн Ажлын хэсгийг ахалж байсан Д.Дэмбэрэл, бид улс төрийн нөхцөл байдлын талаар яриагүй. Чуулганы тухайд Ерөнхийлөгчийн мэдэх асуудал. Анхдугаар чуулганыг нэгэнт эхлүүлсэн юм чинь гишүүдийн тангаргийг өргүүлэх байх. Бид түүнийг хүлээж байна гэж сэтгүүлчийн асуултад хариулахдаа хэлэв.

Монгол Улсын ГХЯ-ны Хэвлэлийн төлөөлөгч, Гүржийн Өмнөд Осетод болсон үйл явдалтай холбогдуулж байр сууриа илэрхийлэхдээ асуудлыг яриа хэлэлцээний замаар шийдвэрлэнэ гэдэгт найдаж буйгаа мэдэгдлээ. Америкийн Засгийн газарт гадаад бодлогын зөвлөхөөр ажиллаж байсан хатагтай Нэнси Содерберг манай оронд ирэв.

МЯГМАР. МАХН-аас УИХ-д сонгогдож байсан хийгээд сонгогдсон гишүүд тус тусдаа хуралдав. Уг хуралдааны үр дүнгийн талаар мэдээлэхдээ, СЕХ-ны даргыг тийм ч амархан огцруулчих эрх зүйн боломжгүй хэмээн Ц.Нямдорж сэтгүүлчдэд хэлэв. Үнэндээ ч энэ албыг хашиж байгаа хүнийг "оролдоод" байх замыг хуулиар сайн хааж өгчээ. Эс тэгвэл сонгуульд ялагдсан намууд түүнд амар заяа үзүүлэхгүй нь ойлгомжтой.

Шинэ Зеланд улсын амбан захирагч Ананд Сатиананд хоёр өдрийн айлчлал хийхээр Улаанбаатарт ирэв. Тэрбээр манай Ерөнхийлөгчтэй уулзаж, Ерөнхий сайдыг хүлээн авч уулзлаа.

Монгол Улсын Ерөнхийлөгч зарлиг гарган БНХАУ-д суугаа Элчин сайд Г.Батсүхэд Онц бөгөөд Бүрэн эрхт элчин цол олгосноо, Японы Элчин сайд Ясуёоши Ичихашид Алтан гадас одон хүртээснээ гардуулж өглөө.

"Гүрж-Осетийн сөргөлдөөний бүс нутагт энхийг тогтоохын тулд..." хэмээн нэрлэсэн байлдааны ажиллагааг зогсоосноо ОХУ-ын Ерөнхийлөгч Дмитрий Медведев мэдэгдлээ.

ЛХАГВА. УИХ-ын гишүүнээр сая сонгогдсон хүмүүс тангаргаа өргөж, бүрэн эрхээ хэрэгжүүлж эхлэх нь Монголын төрийг гацаанаас гаргах алхам төдийгүй улс орон, ард олны эрх ашигт нийцнэ гэж үзэж буйгаа АН-аас сонгогдсон Э.Бат-Үүл, Б.Батбаяр нар мэдэгдлээ. Тэд намынхаа удирдлага, зарим гишүүдийн хатуу чиг шугамыг эсэргүүцэв. Тэд шинэ УИХ-ын анхдугаар чуулганыг үргэлжлүүлж тангаргаа өргөх нь зүйтэй гэж үзэж бусдыгаа уриалав. Э.Бат-Үүл энэ тухайгаа сэтгүүлчдэд мэдэгдээд манай сурвалжлагчийн асуултад хариулахдаа "АН-ын гишүүд итгэл хүлээлгэвэл түүний даргын албыг хашихаас ч дургүйцэх юмгүй" гэж хэллээ.

УИХ-ын Анхдугаар чуулганы ажиллагааг үргэлжлүүлж, гишүүдийг тангараг өргүүлэхэд Ерөнхийлөгчийг санаачилга муутай ажиллаж байна гэж тэрбээр бас зэмлэв. Анхдугаар чуулганыг даргалж буйн хувьд намуудыг зөвшилц гэчихээд аяыг нь хараад суух ёсгүй гэж тэр үзэж байгаа юм.

Тэгвэл УИХ-ын гишүүнээр сонгогдчихоод тангаргаа өргөх эсэх нь тухайн хүний ёс суртахууны асуудал. Түүнээс биш хурал хаясан хүмүүсийг Ерөнхийлөгч хүчилж тангараг өргүүлэх боломжгүй гэж Улс төрийн бодлогын зөвлөх нь төрийн тэргүүнийг "өмөөрөв".

ПҮРЭВ. УИХ-ын 2008 оны сонгуулийн Хэнтий аймгийн тойргийн дүнг СЕХ-ны дарга Б.Баттулга Ерөнхийлөгчид айлтгав. Маргаантай гэгдэж байгаа гурван тойргийн нэг нь эднийх юм.

УИХ-ын Анхдугаар чуулганыг үргэлжлүүлэхээр Ерөнхийлөгч гурав дахь удаагаа оролдов. МАХН-ын гишүүдээс гадна АН-аас сонгогдсон Э.Бат-Үүл, Б.Батбаяр хоёр чуулганы танхимд ирсэн байлаа. Гэвч АН-ын Гүйцэтгэх зөвлөл нь УИХ-д сонгогдсон гишүүдээ оролцуулан өргөтгөсөн хуралдаан хийгээд энэ хоёрын санаачилгыг дэмжээгүйгээр барахгүй намын зүгээс тэдэнд зэмлэл хүртээжээ. АН-ын гишүүд ийн зөрүүдэлснээс чуулган үргэлжилж чадсангүй. Э.Бат-Үүлтэй нам нь хариуцлага тооцохоор зэхэж буй тухай яриа энэ өдөр чих дэлсэв.

БААСАН. Монгол хүн Олимпоос алтан медаль хүртсэн 2008 оны наймдугаар сарын 14-ний өдрийг монголчуудын үндэсний их бахархал, эвлэрэл, аз хийморийн өдөр хэмээн цаашид үзэж байхыг АН-ын удирдлага санал болголоо. Тэгээд олимпийн аваргуудыг дэмжих сан байгуулснаа мэдэгдэв. Энэ санд Монгол Улсын иргэн бүр нэг доллар хандивлахыг уриалав. Санд хуримтлагдсан хөрөнгийг олимпийн дэвжээнээс алтан медаль авсан тамирчдаа урамшуулахад зориулах аж.

эх сурвалж: өнөөдөр

Танд манай нийтлэл таалагдаж байвал LIKE дараарай!
Сэтгэгдэл
ТАНЫ СЭТГЭГДЭЛ
Таны нэр:
АНХААРУУЛГА: Уншигчдын бичсэн сэтгэгдэлд factnews.mn хариуцлага хүлээхгүй болно. ХХЗХ-ны журмын дагуу зүй зохисгүй зарим үг, хэллэгийг хязгаарласан тул ТА сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдэлийг админ устгах эрхтэй. Сэтгэгдэлтэй холбоотой санал гомдолыг 8919-9080 утсаар хүлээн авна. тэмдэгт.