Та бүхэн алга нижигнүүлэн баяр хүргэх байх гэж найдаж байна

2008/09/03
Share |
Хүмүүс: Э Бат-Үүл | 
Та бүхэн алга нижигнүүлэн баяр хүргэх байх гэж найдаж байна

Ардчилсан намын Үндэсний зөвлөлийн хурал дээр Э.Бат-Үүлийн хэлсэн үг:

Нам дахь фракцууд хоорондоо зөвшилцөж байх хооронд завсар гарсан дээр нь би үг хэлье. Өнөөдөр наймдугаар сарын 30-ны өдөр. Одоогоос яг 20 жилийн өмнө манай гэрт бидний хэсэг нөхөд Шинэ үе гэсэн улс төрийн бүлгэм байгуулж байсан юм. Тэндээс ард түмэнд хандсан ухуулах хуудас гаргаж хотоор наах шийдвэр гаргаж байлаа. Дараа нь бид удалгүй баригдацгаасан. Сонирхолдоо хөтлөгдсөн үү, биднийг тухайн үеийн НАХЯ-ы олон хүн зэрэгцэж сууж байгаад бөөнөөрөө байцааж билээ. Тэдний дундаас нэг нь онцгой тодорч “чамайг энэ улс төрийн хэргийн чинь төлөө цаазаар авна, эх эцэг эхнэр хүүхдийг чинь шоронд хийнэ, үеийн үед нэрийг чинь харлуулна” гэж занаж байсан. Хувь заяаны сонин эргэлтээр яг тэр хүн өдгөө АНУ-д гэр бүлийнхээ хамт цагаачлан аз жаргалтай амьдарч байгаа. Энэ бол ардчиллын буян. Ардчилал бол нийт ард түмэнд хамаатай түгээмэл ойлголт гэдэг нь эндээс харагдаж байна.
Бид Шинэ үе бүлгэм байгуулж байх үеэсээ Мартин Лютэр Кинг, Махатма Гандигийн жишээгээр хүчирхийлэлгүй хувьсгал өөрчлөлт хийж нийгмээ ардчилна гэж тохирсон юм. Өнгөрсөн 20 жилийн турш бид энэ зарчмаа баримталж ганц цонх хагалалгүйгээр манай нийгмийг үндсээр нь өөрчилж чадсан. Бидний хийсэн хувьсгалт өөрчлөлт дэлхийн нийтэд үлгэр жишээ болж байлаа. Америкийн конгресс, Европарламентаас Монголын ардчиллыг үлгэр жишээ тайван хувьсгал болсон гэж үнэлэн тусгай тогтоолоор сайшааж байсан. Гэхдээ бид хатуудаа тулбал зарчим дээрээ хатуу зогсож байсан шүү. 2004 оны сонгуулийн дараа МАХН сонгуулийн дүнг үл зөвшөөрлөө гээд төрийн эргэлтэнд бэлдэж байсан. Тэд Тагнуулын байгууллагаар “Ардчилсан намын нууц төлөвлөгөө” гэдгийг зохиолгон мэдээллийн хэрэгслэлээр тараагаад үүнийхээ хариу арга хэмжээ гэдгийг хийх гэж зэхэж байлаа. Бид телевиз рүү дайран орж олон түмэнд учрыг ойлгуулж байж энэ бусармаг төлөвлөгөөг нь таслан зогсоож байсан. Үүнээс өмнө Гүндалайг хууль бусаар баривчлан шоронд хийхэд нь Ганболд, Баабар бид гурав толгойлон сүрт жагсаал зохион байгуулж өдөрт нь суллуулж авч байлаа. Алив дарангуйлал, түүний шинж тэмдгүүдтэй тухай бүр нь тэмцэж зарчмаа хатуу баримталж ирсэн.
Би өөрийн байгуулалцсан Ардчилсан намын төлөө, ардчилсан хууль ёсны төлөө, ардчилсан байгууллын төлөө 20 жил тэмцлээ. Энэ хооронд би үндсэн зарчмаа баримталж байснаас ямар нэгэн зарчимгүй хуйвалдаан этгээд үйлдэлд оролцож байсангүй. Би Ардчилсан намын өмнө зүй ёсоор хүндлэгдэх хүн гэж өөрийгөө тооцоод энэхүү намын даргын сонгуульд өрсөлдөе гэж бодож байсан юм. Гэтэл тогтсон зарчмаасаа ухарч, дүрмээ дур мэдэн өөрчилж, фракц бүлгээрээ талцаж сонгууль хийх гэж байгаа учраас энэ бодлоосоо татгалзаж байна. Албан тушаалын төлөө буй болсон бүлэглэлээ фракц энэтэр гэж нэрлээд байгаа болохоор намын даргын сонгуульд орох нь утгаар бага юм гэж би үзлээ.
Батжаргалын Батбаяр бид хоёрыг намын дүрэм зөрчиж УИХ-ын гишүүний тангаргаа өргөх гэж завдсан хэмээн шийтгэх, улмаар намаас хөөх саналыг Золбаяр оруулж ирлээ. Манай Ардчилсан намын дүрэмд “Үндсэн хуулийг чандлан биелүүлж сахин хамгаалах” гэсэн заалт байгаа. Ямар ч маргаанаас болж Үндсэн хуулийг зөрчих, түүний эсрэг явах, парламетат ёсыг алдагдуулах, алдагдуулахаар оролдох нь намын дүрэм үндсэн зарчмыг зөрчсөн хэрэг болно. Энэ утгаараа бид хоёр харин ч намын дүрмээ, хөтөлбөрөө, үзэл баримтлалаа, зарчмаа ягштал дагасан хэрэг юм. Бүлэг фракц болон хуваагдаад хоорондоо тохиролцож байгаагаа зарим нь ойлголцол гэж нэрлэх юм. Ийм ойлголцлоор үзэл баримтллаасаа урвах юм бол, зарчмаасаа ухрах юм бол, дүрмээ зөрчих юм бол, хөтөлбөрөөсөө татгалзах юм бол ямар юмны ойлголцол байх билээ.
Та бүхэнд хэлсэн ёсоор өнөөдөр миний баярын өдөр. Зарчимдаа үнэнч тууштай хорин жил явж чадсан надад та бүхэн алга нижигнүүлэн баяр хүргэх байх гэж найдаж байна. Цаашид ч би намын зарчим, хөтөлбөр, дүрэмд үнэнч байх болно. Би найз нөхөдтэйгээ хорин жилийн ойгоо тэмдэглэхээр явах гэж байна. Энэ байдлыг ойлгож надад чөлөө өгнө үү. Та бүхэнд баярлалаа.

Танд манай нийтлэл таалагдаж байвал LIKE дараарай!
Сэтгэгдэл
gar shaagd bai lalaraA
IP:112.72.12.6  2019-05-31 13:47:24
ТАНЫ СЭТГЭГДЭЛ
Таны нэр:
АНХААРУУЛГА: Уншигчдын бичсэн сэтгэгдэлд factnews.mn хариуцлага хүлээхгүй болно. ХХЗХ-ны журмын дагуу зүй зохисгүй зарим үг, хэллэгийг хязгаарласан тул ТА сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдэлийг админ устгах эрхтэй. Сэтгэгдэлтэй холбоотой санал гомдолыг 8919-9080 утсаар хүлээн авна. тэмдэгт.