Э.Бат-Үүл хурал хаяж гарлаа

Төрийн байгуулалтын байн­­гын хорооны өчигдрийн хурлаар Засгийн газрын бү­тэц, бүрэлдэхүүний тухай болон Засгийн газрын тухай хуульд нэмэлт, өөрч­лөлт оруулах хуулийн төслүүдийг  хэлэлцэх байлаа. Байнгын хорооны гишүүдийн ирц бү­рэлдэж хурал эхлэх болоход Э.Бат-Үүл гишүүн "Манай намын бүлгээр Баян­гол дүү­рэг дэх сонгуулийн асуудлыг нэг тийш нь болгож үр дүнг нь оруулж ирэхээс наана Зас­гийн газрын бүтэц бүрэл­дэхүүний асуудлыг хэ­лэл­цэхгүй гэж олонхиороо шийд­сэн тул энэ удаагийн хурлаас завсарлага авъя" гэв. Байн­гын хорооны дарга энэ талаар бүлгийн дарга Ч.Сай­хан­би­лэ­гээс саналыг нь сонсъё гэхэд тэрбээр Э.Бат-Үүлийн эсрэг саналтай бай­гаа­гаа илэр­хийлж "Бид өглөө байнгын хорооны хурлаас завсарлага авсан. Хурал­даа­ныг дахин хойш­луул­мааргүй байна. Уг саналыг байнгын хорооны хурлаар хэлэлцэж өгөхийг хүсч байна" гэлээ.  Олонхийн дэмжлэгээр байнгын хороо хуралдахаар болоход Э.Бат-Үүл гишүүн  "Ард түмний сонголтын дүнг нулимаад хамтарсан Засгийн газар байгуулах тухай ярьсан.  Уг нь ард түмний сонголтын дүнгээр Засгийн газар бай­гуулагдах ёстой. Үндсэн хууль утгаа алдлаа. Үндсэн хууль зөрчөөд байгаа Баянгол дүүргийн асуудал "Эх орны хишиг" зэрэг асуудалд ухам­сартай хандаж нухацтай хэ­лэлцэх үүднээс завсарлага авъя. Үндсэн хууль зөрч­сөн асуудал хэ­лэл­цэх гэж байгаа  учраас энэ хурлыг  хаяж байна"  гээд гарч одлоо. Түүнийг үгээ дуусгаж амжаа­гүй байхад С.Баярцогт "Улс төржихөө боль. Намын бод­логоо дэмжихгүй байгаа бол намаасаа гар" хэмээн АН-ын талцааныг улам ч хурцатгаад авав.  Үүний дараагаар Ц.Эл­бэг­­дорж  "Бид бүлгээрээ ярил­цаад 15 гишүүн завсар­лага авъя гэсэн. Хорин хэдэн гишүүнтэй бүлгийн 15 нь ийм саналтай байсан. Энэ хуга­цаандаа байнгын хорооныхоо асуудлыг  ажлын хэсгийнхээ  хүрээнд ярилцъя. Тэгэхгүй бол нэг хэсэг нь зөвхөн өөрс­дийн хувийнхаа сонирхлыг хамгаалсан тэрнийхээ  төлөө үхэн хатан зүтгэж хууль зөрчсөн үйлдлийг батал­гаа­жуулсан явдал болно шүү гэсэн. Иймд манай бүлгийн шийдвэрийг харж үзээсэй гэж бодож байна" хэмээн саналаа хэлээд гарсан.

Эх сурвалж: Өдрийн сонин