Намрын чуулганд ''Эх орны хишиг'' гэх нэг сая таван зуугийн нэр нь ч багтсангүй

2008/09/26
Share |
Хүмүүс: Д Дэмбэрэл | 
Намрын чуулганд ''Эх орны хишиг'' гэх нэг сая таван зуугийн нэр нь ч багтсангүй

2008 оны УИХ-ын намрын ээлжит чуулганаар хэлэлцэх асуудлын тов тодорлоо. Ха­рин үүн дотор олон түмний хүсэн хүлээж байсан "Эх орны хишиг" буюу хүн бүрт өгнө гэсэн нэг сая таван зуун мянган төгрөгийн талаар үг үсэг ч алга байна.

Тэгэх нь битгий хэл "Эх орны хишиг" гэсэн нэр нь ч чуулганы хэлэлцэх асуудлын дотор багтсангүй. МАХН зөвхөн энэ амлал­таа­раа л 2008 оны УИХ-ын сон­гуульд ялсан билээ. Ард түмэн Ардчилсан намын ам­алж байсан нэг сая төгрөгийн оронд арай илүү тоотой юм хэмээн МАХН-ын нэг сая таван зууг сонгосон. Сонгуулийн үеэр энэ мөнгө ямаршуухан шуугиан тарьж байсныг бид мартаагүй бай­на. Хүмүүсийн дунд МАХН-ны нэг сая таван зуун төгрөгийг ХААН банкны салбаруудаар олгоод эхэллээ гэсэн цуу тарж түүнд нь үнэмшсэн иргэд тус банкийг нураачихаа алдаж байлаа. Энэ цуу яриаг гэнэт дуулсан настай эмэг­тэй хоцорчих вий хэмээн айхдаа хувцсаа ч сольж чадалгүй гэрийн ха­лаад­­тай­гаа такси хүлэглэн давхин ирж байсан.

"Эх орны хишиг" өгөх сур­гаар зарим иргэд богино хугацаатай зээл банкнаас аваад машин болгоод уначих­сан яваа гэсэн. Мөн ард тү­мэн шинэ УИХ хуралдаж эх­лэхийг тэсэн ядан хүлээж байлаа. Хуралдаан эхэлмэгц л ард түмэндээ өгөх мөнгийг хамгийн түрүүнд хэлэлцээд эхэлнэ хэмээн ярилцаж байв. Тэд "эх орны хишиг" түгээж эхлэх өдрийг үзэхийн тулд юугаа ч золиослохоос буцах­гүйдээ хүрсэн.

Үүний жишээ нь таван иргэнээ буудаж алаад, 800 хүнийг улс төрийн хэргээр шоронд хорьчихоод байхад л хариуцлага тооцно гэхээсээ илүү ажлаа хурдан эхлээч гэж шаардаж байв. Ардчилал шударга ёс гэхээсээ илүү арав таван төгрөг хэзээ өгөх нь вэ хэ­мээн харуулдаж ирлээ. Ард түмэн яагаад ийм их итгэлтэй мөнгө өгнө гэж бодож байв. Яагаад гэвэл төр засгийн удирдлагууд болох Ерөнхий сайд С.Баяр болон бусад сайдууд бүгд УИХ-ын анхны хуралдаанаар нэг сая таван зуун мянган төгрөг иргэн бүрдээ өгөх тухай хуулийн төслийг хэлэлцэж батална хэмээн хэлж байсан. Үүний­хээ баталгаа болгож батламж хүртэл тараасныг бид мартаж амжаагүй байна. МАХН-аас сонгогдож гарсан УИХ-ын гишүүн бүр түүнийг л хэлж байж сонгогдсон. Тэгэх­лээр ард түмэн үнэмшихээс өөр яах юм бэ. С.Баярын Засгийн газар бол "Эх орны хишиг" өгөхийн тулд л бий болж байгаа Засгийн газар юм . Ард түмэн үүнээс өөр юу ч тэднээс горьдоогүй. Горь­доод ч нэмэргүй гэдгийг мэ­дэхтэйгээ болсон. Яагаад гэвэл хуучин төр засгийн өндөрлөгт байж авлига, хүнд суртлын хэл аманд өртдөг хуучин хэдэн нөхөд л сайд болон гарч ирсэн.

Гэтэл энэ намрын чуулганы хэлэлцэх асуудлын тоонд нөгөө бидэнд өгөхөөр амлаад байсан мөнгө өгөх асуудал багтсангүй. Тэгэхлээр лав л ирэх жил "эх орны хишиг" өгөхгүй гэсэн үг бол­жээ. МАХН ард түмнээ хуурч худлаа ярьж байсан байх нь. Нэг үгээр хэлбэл "хар усан дээр өрөм байлгаж" байжээ. Ерөнхий сайд С.Баяр ч бид­нийгээ молигодож бай­гаагаа мэдэж байсан биз. Харин үнэмшинэ чинээ санаа­гүй байх. Бүхэл бүтэн улс эх орон ард түмнээ ингэж хуурч бо­лох уу. Тэгж болохгүй. Яадаг ч байсан 2009 онд багтаан "Эх орны хишиг"-ийг ард түмэн­дээ олгох ёстой. Хэрэв тэгж чадахгүй юм бол энэ Засгийн газартай ард түмэн хариуц­лага тооцно. Зөвхөн Засгийн газартай хариуцлага тооцох нь ч хэтэрхий хөнгөдсөн хэрэг болно. Түүний оронд худал амлалт, булхай луйв­раар сонгуульд санал авч олонхи болсон МАХН-д хатуу хариуцлага тооцох хэрэгтэй байна. Хэрэв "Эх орны хишиг"-ийг ард түмэн­дээ жил бүр өгч чадах­гүй юм бол МАХН-ыг татан буулгах ёстой. Худлаа хэлэхэд ч бас хэмжээ байдаг. Хэн хүссэн нь юу дуртайгаа худлаа ярьж байгаад төрийн эрхийг авч болохгүй биз дээ. Энэ улс орон чинь бүгдээрээ "дөчин мянгатын атаман"-ууд гэгдэх хулигаанууд болчихоогүй байна.

эх сурвалж: Өдрийн сонин

Танд манай нийтлэл таалагдаж байвал LIKE дараарай!
Сэтгэгдэл
ТАНЫ СЭТГЭГДЭЛ
Таны нэр:
АНХААРУУЛГА: Уншигчдын бичсэн сэтгэгдэлд factnews.mn хариуцлага хүлээхгүй болно. ХХЗХ-ны журмын дагуу зүй зохисгүй зарим үг, хэллэгийг хязгаарласан тул ТА сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдэлийг админ устгах эрхтэй. Сэтгэгдэлтэй холбоотой санал гомдолыг 8919-9080 утсаар хүлээн авна. тэмдэгт.