Надад тийм үнэтэй даашинз байхгүй

2009/04/14
Share |
Хүмүүс: Д.Пүрэвсүрэн | 
Надад тийм үнэтэй даашинз байхгүй

"Big line film" этертаймент студи, "Comedy Art" хамтлагийн бүтээл болох "Гоёлын даашинз" хэмээх хөгжимт инээдмийн кино ирэх баасан гарагт нээлтээ хийх нь. "Сайн уу амьдрал минь", "Боолын гэрээ" кинонд хамтарч ажилласан авьяаслаг уран бүтээлчид уг киногоо дуу хөгжим хосолсон өвөрмөц зохиомжтой хийсэн аж. Энэхүү киноны дууг дуучин Б.Эгшиглэн, ВХ нар амилуулсан бол гол дүрд нь "Акапелла" хамтлагийн дуучин Б.Одбаяр, топ модель Д.Пүрэвсүрэн нар тогложээ. Энэ удаагийн булангийн зочноор Д.Пүрэвсүрэн уригдлаа.

"Гоёлын даашинз" кино таны тоглосон хэд дэх бүтээл вэ?
Дэлгэцийн бүтээл талаасаа хоёр дахь нь. Хөгжимт драмын чиглэлээр тоглосон анхны кино. Гэхдээ өмнө нь "Хувьсал" продакшнд ажиллаж байхдаа дуу, бүжгийн хэсэг бүхий "Зургаадугаар сар минь баяртай" жүжигт тоглож амжсан шүү.

Дуучин Эгшиглэнгийн хоолойг "ашиглаж", дүрээ амилуулсан гэлээ. Өөрөө дуулах боломжгүй байсан юм уу?
Байсан. Гэхдээ бид киногоо сонирхолтой болгох үүднээс мэргэжлийн дуучдыг урьсан юм. Кино маань зургаан дуу, дөрвөн бүжигтэй.

Загварын ертөнцөөс нэлээд хөндийрсөн юм шиг санагдлаа. Жүжигчнийхээ мэргэжлээр ажиллах нь уу?
Загварын ертөнцөөс хөндийрөөгүй ээ. Өнгөрсөн аравдугаар сард "Гоёо" компанийн шоунд оролцож, улмаар Н.Соёлмаа эгчтэй хамт Америкт очоод ирсэн. "Гоёл-2009" наадмын дараа киноныхоо бэлтгэл ажилд орсон төдигүй "Сүү", "Дархан минж" компанийн сурталчилгаанд тоглох гэх зэрэг бүх ажлаа амжуулаад явж байна.

Дараагийн уран бүтээл гэвэл..?
Ирэх зун шинэ киноны зураг авалтанд орохоор ярилцаж байгаа. Энэ бүрэлдэхүүнээрээ оролцоно. Өөр санал ирж магадгүй л дээ. Юутай ч уран бүтээлээ цаашид үргэжлүүлнэ.

Ингэхэд гоёлын тань цуглуулгад 1000 ам.долларын үнэтэй даашинз бий юу?
Надад тийм аймаар үнэтэй даашинз байхгүй ээ. Шоу тоглолтод оролцохдоо олон төрлийн ноолууран даашинз өмсч байсан ч халууцах, хөлрөх, хүнддэх гээд л олон бэрхшээл мундахгүй. Харин 1000 ам.долларын даашинз маань их нимгэн, бас үнэтэй чимэглэлээр гоёсон учраас надад их тааламжтай санагдсан шүү. Гэхдээ яагаад ч юм бэ, ийм даашинз худалдаж авах юмсан гэх хүсэл төрөөгүй. Миний сонирхол өөр юм байлгүй

Ихэвчлэн жүжигчин Б.Одбаярын амраг бүсгүйн дүрд тоглосон болохоор ч тэр үү. Түүнтэй нэр холбогдох асуудал их гардаг байх?
Тийм ээ. Оюутан байхаасаа эхлээд л хамтарч тоглосон болохоор хүмүүс биднийг холбож ойлгох нь элбэг. Хэдийгээр сайн найзууд ч гэлээ, эсрэг хүйстнээ сонирхох, үнэлэх үнэлэмж маань тэс өөр, Бие биенээ амрагийн нүдээр ч хардаггүй. Би Б.Одбаярыг, тэр намайг сонирхдоггүй гэсэн үг.

Хувийн амьдралын чинь талаар нэлээд таагүй яриа гарах болсон. Энэ үнэн гэж үү?
Тодорхой яримааргүй байна. Сонин хэвлэлээр маш их шуугисан боловч энэ тэр гэж хөөцөлдөх зав алга. Удирдлагын академид бизнес удирдагын чиглэлээр суралцаж байгаа учир төгсөлтийн шалгалтандаа бэлтгэж эхэллээ. Киноны нээлт болох өдөр дипломоо хамгаалах болчихоод ачаалал ихтэй байна.

Тэгэхээр энэ бүхэн ор үндэсгүй зүйл гэсэн үг үү?
Няцааж чадахгүй л дээ. Гэхдээ би дэлгэрэнгүй ярихгүй

Өнөөдрийн монгол

Танд манай нийтлэл таалагдаж байвал LIKE дараарай!
Сэтгэгдэл
ТАНЫ СЭТГЭГДЭЛ
Таны нэр:
АНХААРУУЛГА: Уншигчдын бичсэн сэтгэгдэлд factnews.mn хариуцлага хүлээхгүй болно. ХХЗХ-ны журмын дагуу зүй зохисгүй зарим үг, хэллэгийг хязгаарласан тул ТА сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдэлийг админ устгах эрхтэй. Сэтгэгдэлтэй холбоотой санал гомдолыг 8810-1274 утсаар хүлээн авна. тэмдэгт.