Зоригийн хэргийг сөхөх зорилго юу вэ

2010/01/18
Share |
Зоригийн хэргийг сөхөх зорилго юу вэ

1998 оны 10 дугаар сарын 2-ны өдөр Монгол Улсын Их Хурлын гишүүн, Засгийн газрын гишүүн, Дэд бүтцийн хөгжлийн сайдын үүрэг гүйцэтгэгч С.Зориг гэртээ онц хэрцгийгээгээр алагдав.

 Алуурчид нь эрэгтэй, эмэгтэй хоёр,
тэдгээр нь Оюун, Батаа гэсэн нэртэй, бас бэлээхэн гэрч, нотолгоотой энэ хэрэг илрэхгүй арав гаруй жилийн нүүр үзэж, үндсэндээ горьдлого тасраад байгаа үе. Уг нь манай цагдаагийнхан энэ байтугай хэргийг илрүүлдэг. Хэрэг гарах тэр үе С.Зоригийг хоёрхон хоногийн дараа Ерөнхий сайдаар томилуулах шийдвэртэй цаг хугацааны хувьд давхарддаг. Анхнаасаа энэ хэрэг улс төрийн захиалгатай аллага гэсэн итгэл үнэмшил олон нийт дунд бий болсон. Одоо ч хэвээрээ.

Илрэх нь байтугай итгэл алдраад байгаа энэ цагт С.Зоригийн хэргийн сэжигтнийг илрүүллээ гэх мэдээлэл үе үе дуулдах боллоо. Барагтай мэдээллийг шүүрч аваад байдаггүй "Өнөөдөр" сонин өнгөрөгч долоо хоногийн сүүлчээр нэгэн мэдээлэлд анхаарал хандуулжээ. Тэңд дурдсанаар бол "ажлын хэсэгт ойр эх сурвалж, хэргийн мөрөөр орсон, аллага үйлдсэн байж магадгүй сэжигтнийг тогтоосон, түүнийг баривчлахаар Улаанбаатараас холгүй орших нэгэн аймгийг тусгай албаныхан зорьсон" гэж өгүүлжээ. Энэ мэдээнд итгэх эргэлзэхийн аль аль учир шалтгаанаар хандах хэрэгтэй байх. Үлгэр биш үнэн байгаасай гэсэн бодлыг олон хүн тээж яваа байх.

Үүнээс хэдхэн хоногийн өмнө бас иймэрхүү утгатай мэдээлэл манай өдөр тутмын нэгэн томоохон сонинд гарсан. Үнэхээр олон түмний хүлээлт дээр тоглосон иймэрхүү бор шувуу нисээд байгаа юм биш биз гэсэн хар сэр төрж байна. Энэ бол үүний цаана томоохон тоглолт явагдаж байгаагийн дохио байж болох. Чухам ямар гэдэг нь тодорхой бус.
Дээрх мэдээлэлд эргэлзээтэй хандах шалтгаан байгаа болохоор ингэж хэлэх үндэслэл байна. Зоригийн хэргийн сэжигтнийг баривчилсан гэх мэдээлэлд УИХ-ын Аюулгүй байдлын байңгын хорооны гишүүд болон тухайн асуудлыг хариуцаж байгаа хүмүүс "Тийм зүйл болоогүй. Цуурхал л явж байна даа" гэсэн хариулт өгчээ.
С.Зоригийн хэргийн талаарх үнэн бодитой мэдээлэл өгсөн иргэнийг 500 сая төгрөгөөр шагнах тухай Засгийн газрын 2003 оны 02 дугаар сарын 05-ны өдрийн тогтоол гарсан. Мөн энэ ажлын хүрээнд Олон улсын парламентийн байгууллага болон Интерполын гишүүн улсууд, тэдгээрийн тусгай албад, зарим орнуудын шүүх шинжилгээний байгуулгуудын туслалцаа дэмжлэгийг авч хамтран ажиллаж байна.

С.Зоригийн хэргийн илрүүлэлт харамсалтай нь улстөржиж, нам холбоодын найраанд хавчуулагдах болсон. 2000 оны сонгуулийн амлалтад энэ хэргийг илрүүлэх тухай үг өгүүлбэр хавчуулагдаж явсныг анзаарсан байх.

2004 оны сонгуулийн өмнөхөн С.Зоригийг хэргийг илрүүллээ гэх мэдээлэл нэлээд чих дэлссэн юмдаг. Д.Энхбат гэгчийг Францаас сүр дуулиантайгаар баривчилж ирсэн. Энэ явдлыг хүний эрхийг аймшигтайгаар зөрчин хил дамнуулан хүн хулгайлж ирсэн гэж тухайн цагтаа нэлээдгүй шуугиж байсан. Ийн хэл аманд өртөн байж Д.Энхбатыг хэрэг нотлогдоогүй, тэрбээр өвчний учир нас барсан. Түүнийг баривчилж ирснийг гэрчлэх онгоцны үйлчлэгч бүсгүй бас золгүйгээр нас барсан нь тохиолдлын хэрэг үү, тодорхой зорилгын золиос уу гэдэг нь эргэлзээтэй асуудал юм гэсэн. Ер нь Зоригийн хэргийн эргэн тойронд учир битүүлэг учрал тохиол цөөнгүй бий гэж "мэдэмхийрэх" хүн ч бий. Тухайлбал сэжигтэн Б болон мөрдөн байцаагч нар нь тодорхойгүй шалтгааны улмаас нас барсан гэж яригддаг.

Юутай ч хэрэг дээр ажиллаж байсан ажлын хэсгийнхэн энэ хугацаанд хэдэнтээ өөрчлөгдсөн ч тодорхой ахиц гараагүй гэсэн нэлээн үнэнд ойртох таамаглал хандлага байдаг.
Гэвч сүүлийн үед хэрэг илэрч байгаа гэсэн мэдээлэл үе үехэн цацагдах болоод байгаа нь хачирхалтай. Иймэрхүү мэдээллийг олон нийт итгэх эргэлзэхийн аль алинаар нь хүлээж авч байгаа нь тодорхой. Нам гүм, хүмүүсийн ой тоонд бараг мартагнаад байсан эл хэргийг ийн үнэн худал нь мэдэгдэхгүй цуурхалаар дахин өдөөх нь хэнд ямар хэрэгтэйг хэлж мэдэхгүй юм. Зорилгогүй хандлага гэж юу билээ. Тэгэхээр хэн юуны тулд ийм мэдээлэл цацаад байгаа нь анхаарал татахгүй байхын аргагүй мэт.

Я.Хийморь /Нийслэл таймс/

Танд манай нийтлэл таалагдаж байвал LIKE дараарай!
Сэтгэгдэл
ТАНЫ СЭТГЭГДЭЛ
Таны нэр:
АНХААРУУЛГА: Уншигчдын бичсэн сэтгэгдэлд factnews.mn хариуцлага хүлээхгүй болно. ХХЗХ-ны журмын дагуу зүй зохисгүй зарим үг, хэллэгийг хязгаарласан тул ТА сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдэлийг админ устгах эрхтэй. Сэтгэгдэлтэй холбоотой санал гомдолыг 8810-1274 утсаар хүлээн авна. тэмдэгт.