Экс Ерөнхийлөгч Н.Энхбаяр уурандаа салаавч гаргажээ

Сайн найруулагчдын сэтгэлээс сэдэв нь урган гарч, сэдэл бүхнийг өөртөө ашиг­тайгаар эргүүлж явдаг. Энэ жишээг эрхэм экс Ерөн­хийлөгч Н.Энхбаярын  үйлд­лүүдээс тодхон харж болно.

Анхны шүүх хурлын үеэр өлсгөлөн зарласнаас болж биеийн байдал нь муу байсан. Хоёр дахь удаагийн тов зарлагдахад өөрийн биеэр очсон ч өмгөөлөгч нараа сольсон гэх шалтгаанаар дахин хойшлуулсан. Иймэрхүү байдлаар тэрбээр өөртэй нь холбоотой гэх хэргийн шүүх хурлыг хойш­луулсаар байна.    
Тэгвэл гурав дахь тов нь уг нь мар­гааш. Биеийн байдал нь дээрдсэн. Өмгөөлөгч нараа сонгосон. Гэсэн ч экс Ерөнхийлөгч хурлаа хойш­луулах дараагийн шалт­гаа олсон гэдгээ хэвлэлийнхнийг цуглуулсан уулзалтдаа ам алдлаа.

Тодруулбал, Н.Энхбаяр өнгөрсөн баасан гарагийн орой МАХН-ын байранд хэвлэлийнхэнтэй уулзалт зохион байгуулав. Тэрбээр энэ үеэрээ өлсгөлөн зарласнаас болж биеийн байдал, эрүүл мэнд нь хэр хохирсон, одоо ямар байгаа талаар чөлөөтэй ярилц­сан. Түүний хувьд эмнэл­гээс гарснаас хойш сэтгүүл­чидтэй ийнхүү нээлт­тэйгээр анх удаа уулз­сан юм.

Мөн тэрбээр Төв аймгийн Урьдчилан хорих төвд хоригдож байх үедээ ямар нөх­цөлд байсан тухайгаа болон өлсгөлөн зарласан бай­хад нь тус төвийн ажилт­нууд яаж “горьдоож” ходоодыг нь ажиллуулсан. Чухам яагаад ажил үүргээ гүй­цэтгэж байсан хүмүүсийн өөдөөс салаавч гаргасан гэх зэр­гээр тайлбар хийж байлаа.
Сэт­гүүл­чид түүнээс Урьд­чилан хорих төвд байхдаа гар утас ашиглан хууль зөрчсөн талаар ч асуусан. Харин экс Ерөнхийлөгч “Манай хамгаалагчдыг Урьдчилан хорих төвд байлгахгүй гэсэн шийд гарсан. Би хам­гаалагчгүй очихгүй гэсэн. Тэгэхээр манай өмгөөлөгч: “Ийм шийд гарсан болохоор та аюулгүй байдлаа бодохгүй бол болохгүй. Гар утастай байж бай. Ямар нэгэн байдлаар амь насанд чинь аюул учирбал мессеж илгээ” гэсэн.

Өөрөөр хэлбэл, таны аюулгүй байдал эрсдэлд орлоо гэж тайлбарласан. Би тэр утсаар яриагүй, ямар нэг ч мессеж бичиж явуулаагүй. Юмыг яаж мэдэх вэ, хамгаалагчгүй юм чинь аюулгүй байдал шийдэгдтэл гээд гар утсыг халаасандаа байлгасан. Түүнээс утсаар ярьж, мэдээлэл тараасан зүйл байхгүй” хэмээсэн.
Харин олны анхаарлыг ихээр татаж, Ерөнхийлөгч байсан хүн бусдыг дором­жилж салаавч гаргасан тухайд “Өлсгөлөн зарласан хүн чинь ууртай байгаа шүү дээ. Тэгтэл өлсгөлөн зарлаж байгаа хүнтэй хүндэтгэлгүй, ёс бусаар харьцаж, хууль бус олон үйлдэл гаргасан.  Тэр бүрт нь хүлээцтэй хандаж, харьцсан ч тэд хүлээж аваагүй. Тэгээд л та нарын мэддэг хэл, харьцдаг харьцаагаар чинь харьцъя гээд салаавч гаргасан. Өлсгөлөн зарлаж байгаа тохиолдолд хянах зорилгоор 24 цагийн турш хянадаг. Ер нь тэр бичлэгийг олон нийтэд зарлах нь өөрөө хууль бус үйлдэл. Нэгэнт тэр бичлэгийг гаргаж байгаа бол 32 өдрийн бичлэгийг бүтнээр нь үзүүлэх ёстой” гэж байлаа.
Харин нүцгэн хоригдлууд дундуур явуулсан тухайд “Өмгөөлөгчтэйгээ уулзахаар бууж байхад хоригдож байсан хүмүүсийг нүцгэлээд, галуун цуваагаар алхуулж байсан. Өмгөөлөгчөөсөө учрыг нь асуухад хашрааж, хэрэг хүлээлгэх аргуудын нэг гэж тайлбарласан” гэсэн тайлбарыг хийв.

Өөрт нь үүсгэсэн хэр­гийн хувьд ““Өргөө” зочид буу­дал, “Улаанбаатар таймс” сонины хэрэгт би огт хамаа­рал­гүй. Би буруугүй. Шүүх шу­дарга байвал би ялах нь тодор­хой.  Харин дээрээс өгсөн даалгаврын дагуу шудар­га бусаар намайг ял­лах юм бол худал хуурмаг ял­лаа гэсэн үг. Одоо яахыг харъя.  Өөрийнхөө эрхийг хам­гаалахийн төлөө ямар боломж байна, тэр бүхнийг хийнэ. Энэ бол ганц Н.Энх­баярын асуудал биш, Мон­голын нийт ард түмний асуу­дал. Н.Энхбаярыг ингэж чадаж байгаа юм чинь хэнийг ч ингэж чадах нь байна гэсэн тог­толцоо тогтоно. Тиймээс Н.Энх­баяр өөрийгөө биш, Монголын ард түмэн нийлээд Н.Энх­баярыг хамгаалах ёстой.  Хэлмэгдүүлэлт нэг хүнээс эхэлдэг. Сүүлдээ бүгд хэлмэгдэж дуусдаг” гэж хариулсан юм.

Хэдийгээр тэрбээр намын­хаа сонгуулийн ажилд идэв­хийлэн ажиллаж байгаа ч байн­га эмнэлгийн хяналтад байх ёстой гэнэ. Өлсгөлөн зарлахаас өмнө 93 кг жинтэй бай­сан ч одоо 77 орчим кг бол­жээ. Мөн элэг, бөөрний ажил­лагаанд  өөрчлөлт орсон, зүрх, тархины үйл ажил­лагаанд нөлөөлөл ороогүй ч, цус өтгөрснөөс цус­ны эргэлт нь удааширсан. Эмч нарын зөв­лөс­нөөр түүнийг байнгын дэглэм барьж эмчилгээ хийл­гэвэл намар гэхэд тэнхэрнэ гэсэн ажээ.

Эх сурвалж: "Өглөөний сонин"