Д.Арвин өөрийн бизнесээ хамгаалахын тулд АН элсэв үү

Сүүлийн хэд хоног улс төрийн хүрээнд маргаан дагуулж, олон нийтийн анхаарлыг татаж байгаа гишүүн бол Д.Арвин. Парламентад дөрөв дэх удаагаа сонгогдох хүртэл зүтгэж, амьдралаа холбосон эрхэм хатагтай өчигдөр Ардын намаасаа гарах өргөдлөө өгч олныг шуугиулсан. 1990-ээд оны үед тухайн үеийн МАХН-д элсч, улс төрийн ширүүн өрсөлдөөнд хүч үзэж яваа Д.Арвинг Ерөнхийлөгч асан Н.Энхбаярын хамгийн ойрын хүн байсан гэж олон хүн үздэг. Д.Арвин ч энэ хугацаанд Н.Энхбаяр даргадаа чин шударга байснаараа олон нийтэд таалагдахуйц имиж бүрдүүлсэн. Өөрийн намаа цээжээрээ дэлдэх шахам хамгаалж байсан дайчин хатагтай Н.Энхбаярыг хүнд үед таг дуугүй болчихсон төдийгүй намаасаа урваж шарваж байгаа нь хачирхалтай. Юутай ч нам нь түүнийг хаялгүй Баянзүрх дүүрэгт нэр дэвших эрхээр шагнасан нь үнэн. Харин тэрээр намаасаа нэр дэвшин ялж гарч ирчихээд “Нам миний эсрэг ажилласан. Би МАН-ыг ядарсан үед нь орхиогүй, задарсан үед нь гарч байна” хэмээн ичих булчирхайгүй улс төрийн шоу болгож ярьсан байх юм.

   МАН ид мандаж байхад Д.Арвин өөрийн биенесээ ёстой л нэг хөгжүүлсэн гэхэд болно. Өнгөрсөн жил үүд хаалгаа нээж, Баянзүрхийн эхчүүдэд үйлчлэх ёстой байсан 150 ортой шинэ амаржих газрын барилгын мөнгийг Д.Арвингийн “Их өргөө” компани хоёр жилийн өмнө авчихсан байдаг. Гэвч эмнэлгийг барьсангүй. Д.Арвин амаржих газрын тендерт хэрхэн ялсан нь тодорхойгүй. Ямар компаниуд энэ тендерт өрсөлдсөн талаар ч мэдээлэл байдаггүй.

Харин баттай хэлэх нэг зүйл бол төсвийн хөрөнгөөр баригдахаар төсөв мөнгийг нь шийдээд, урьдчилгаа гурван тэрбум төгрөгийг “Их өргөө” компани руу шилжүүлсэн ч эмнэлгийн барилга дөнгөж сууриа цутгасан өнөөг хүртэл байна.  

Тэрбээр дөнгөж сая АН-д гишүүнээр элсэж, АН-ын батламжаа гардаж авлаа. Тэгвэл Д.Арвинг намаа хамгийн хүнд үед нь хаяж явж байгаа учраас жинхэнэ урвагч гэж үзэх хүн байхад БЗД-ийн төрөх эмнэлгийн мөнгийг “залгисан” жудаггүй эрхэм хатагтай өөрийн бизнесээ хамгаалахын тулд элслээ гэж үзэх ч хүн байна.