УИХ-ын дарга З.Энхболдыг шүүхэд өгч, тэрбум төгрөг нэхэмжлэхээ мэдэгдэв

2014/12/31
Share |
Хүмүүс:
УИХ-ын дарга З.Энхболдыг шүүхэд өгч, тэрбум төгрөг нэхэмжлэхээ мэдэгдэв

МҮОНРТ-ийн захирал М.Наранбаатар дуулиан тарьсан мэдээллийг өнөөдөр хийлээ. Тэрээр УИХ-ын дарга З.Энхболдыг шүүхэд өгч, нэг тэрбум төгрөг нэхэмжлэх болсноо мэдэгдсэн юм.

 

УИХ-ын дарга З.Энхболд УИХ-ын чуулганаар МҮОНРТ-ийн Үндэсний зөвлөлийн гишүүдийг томилох үеэр ““Их хэцүү газар очиж байгаа гэдгээ санах хэрэгтэй. Төсөв нь 50 хувь алга болсон. Хувийн телевизийн 100 хүнтэй хийдэг ажлыг  700 хүний хүчээр хийдэг.

 

Аймшгийн газар байгаа, архи дарс уух нь замаа алдсан. Энэ бүхнийг цэгцлэх үүргийг та бүхэн хүлээж байна. Их хурлаас томилогдож байгаа та бүхэн эргээд байнгын хороотойгоо холбоотой байгаарай. Ядаж хулгайн кино гаргахгүй байх хэрэгтэй шүү дээ, ичмээр юм”  гэж хэлснийг тус телевизийн уран бүтээлчид хүндээр тусган авч, ийн эсэргүүцэхэд хүрээд байгаа юм. 


Энэ бүхний дараа УИХ-ын дарга З.Энхболд дахин "Миний хэлсэн үг зарим хүнд буруу ойлгогдсон байна. Миний үгийг сайн харах юм бол 100 хүнтэй телевизийн ажлыг 700 хүнтэй телевиз хийдэг гэж харьцуулсан. 700 хүнийг архи уудаг гэж яриагүй. Би энэ үгийг Наранбаатар болон түүний тойрон хүрээлэгчдэд хандан хэлсэн. Олон жилийн түүхтэй энэ телевизэд ахиц гарах нь битгий хэл уруудсан. Миний үг М.Наранбаатар болон түүнийг тойрон хүрээлсэн дарга нарт хамаатай учраас тэднээс уучлалт гуйхгүй. Харин уран бүтээлчдэд буруу ойлголт төрүүлсэн бол уучлалт гуйж байна. Удирдлагуудынхаа санаархалд битгий автаарай гэдгийг хэлье"  хэмээн залруулга хийсэн.


Гэсэн ч энэ бүхнийг МҮОНРТ-ийн удирдлага,  уран бүтээлчид хангалтгүй гэж үзсэн бололтой. 
 

Тиймээс энэ бүхэнтэй холбогдуулан өнөөдөр М.Наранбаатар мэдээлэл хийж УИХ-ын дарга З.Энхболдыг шүүхэд өгч, зөвхөн өөрийн төдийгүй энд ажиллаж байгаа бүх ажилчин албан хаагчид цаашлаад нийт сэтгүүлч, уран бүтээлчдийн нэр хүндэд халдсан хэмээн нэг тэрбум төгрөг нэхэмжлэх болно гэдгээ мэдэгдлээ. Харин энэ мөнгийг хувьдаа ашиглахгүй. Телевизийнхээ сайн сайхны төлөө зориулна гэсэн юм. 


 

Танд манай нийтлэл таалагдаж байвал LIKE дараарай!
Сэтгэгдэл
ТАНЫ СЭТГЭГДЭЛ
Таны нэр:
АНХААРУУЛГА: Уншигчдын бичсэн сэтгэгдэлд factnews.mn хариуцлага хүлээхгүй болно. ХХЗХ-ны журмын дагуу зүй зохисгүй зарим үг, хэллэгийг хязгаарласан тул ТА сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдэлийг админ устгах эрхтэй. Сэтгэгдэлтэй холбоотой санал гомдолыг 8810-1274 утсаар хүлээн авна. тэмдэгт.