С.Баярцогт өөрийгөө ”гэмт хэрэг үйлдээгүй” гэв

Сангийн сайд асан С.Баярцогт өчигдөр өөрийн оффшор дансны асуудлаар  сэтгүүлчдэд тайлбар  хийлээ. Энэ үеэр тэрээр өөрийгөө гэмт хэрэг үйлдээгүй хэмээсэн бөгөөд Швейцарь улсаас авчруулсан баримт материалууд түүнд ч мөн бий гэдгийг харуулав. 

Харин тэрбээр Т.Аюурсайхан гишүүнийг хүний хувийн нууцад халдсан хэмээн буруутгаад буй бөгөөд энэ хэрэг тун удахгүй хаагдана гэдэгт итгэлтэй байгаагаа ч мөн зарлажээ. 

Түүнд оффшор данс байсан уу гэвэл байсан. Харин энэ асуудал хууль, хүчний байгууллагын дунд өрнөх ёстой байсан ч дунд нь Т.Аюурсайхан гишүүн орж хутгалдсан нь түүний төлөвлөгөөг нураав бололтой. Тиймээс л тэрээр өөрт байгаа хоёр цүнх дүүрэн баримт материалыг ийнхүү ил гаргаж ирэв үү? Ямартаа ч тэрээр өөрийн оффшор дансны хэргийг тун удахгүй хаагдаж нэг тийш шийдэгдэнэ гэдэгт тун ч итгэлтэй сууна. 

С.Баярцогт: Байгууллагын болон хувь хүний нууц гэж байдаг. Тэрийг Т.Аюурсайхан гишүүн мэдээд ярьж байгаа бол ямар нэгэн байдлаар хууль зөрчсөн байна гэсэн үг. Хоёрдугаарт, дансны хувьд олон мэт харагдаж байгаа байх. Хятад явах гэж байгаа бол бид төгрөгийн дансны хажуугаар юанийн данс нээдэг. Хэрэв европ руу явах гэж байгаа бол еврогоор гүйлгээ хийх учир еврогийн данс нээж таарна. Тиймээс данс нь олон юм шиг харагдаад байгаа юм. Хэрэгтэй холбоотой деталь зүйлс ярихгүй. Хамгийн гол нь Т.Аюурсайхан УИХ-ын гишүүний өндөр нэр хүнд хийгээд УИХ-ын даргыгаа хүртэл оролцуулан байж буруу мэдээлэл түгээж байгаа нь туйлын хариуцлагагүй үйлдэл. Шударга ёс, оффшорын эсрэг тэмцлээ хийх хэрэгтэй. Гэхдээ хуулийн хүрээнд хийх ёстой юм.

Миний АТГ-т гаргаж өгсөн материал Швейцариас ирсэн материалтай бүрэн нийцэж, батлагдана. Тиймээс оффшортой холбоотой хэрэг удахгүй бүрэн дүүрэн шийдэгдэж, хаагдана гэдэгт итгэлтэй байна. Энэ дотор гэмт хэрэг үйлдсэн ямар ч асуудал байхгүй. АТГ, прокурорын байгууллага удахгүй эцэслэх байх” гэсэн юм.

Т.Аюурсайхан: 

2017 оны 4 дүгээр сард Швейцарын Прокурор, "Credit Suisse AG" банк, өмгөөллийн товчоонд илгээсэн миний албан тоотуудыг Ц.Мөнх-Оргил сайдын үед ГХЯ-ны Төрийн дипломат шуудан дээрээс дугтуйг задалж, албан тоотыг замаас нь үзэж, гацааж ч байсан. Тийм учраас арилжааны буухиа шуудангаар илгээж байсан.

2018 оны 4 дүгээр сард ШХУ-ын ГХ-ийн сайд Игнацио Кассис Монголд айлчлахдаа УИХ дахь Оффшорын эсрэг бүлгийн ахлагч надтай уулзах хүсэлт тавьсны дагуу Монгол Швейцарын парламентын бүлгийн гишүүн биш ч гэсэн тус бүлгийн гишүүдтэй хийсэн уулзалтад нь оролцож, С.Баярцогтын дансны талаар маш тодорхой асуудлууд дэвшүүлж, араас нь хөөцөлдсөөр ирсэн. Авилгатай Тэмцэх Газраас ч бас нөгөө талд албан хүсэлт илгээсэн. Хоёрхон хоногт дансны хуулгуудыг аваад ирээгүй юм.

С.Баярцогтын яриаг бүрэн эхээр нь хүлээн авч үзнэ үү: 

Б.Болор

Эх сурвалж: Factnews.mn