Айрагны гэрүүдэд зөвшөөрөлгүйгээр мах худалдаж байна

Баянзүрх дүүргийн Мэр­гэжлийн хяналтын хэлт­сээс тус дүүрэгт зад­гай талбайд худалдаа хий­дэг 40 гаруй нэгж, иргэнд хүнсний эрүүл ахуйн шал­галтыг өнгөрсөн долоо хоногт хийсэн байна. Шал­галтын явцад нэлээд зөр­чил илэрчээ. Энэ талаар тус дүүргийн Мэргэжлийн хяналтын хэлтсийн ху­далдаа, үйлдвэр, үйлчил­гээ, стандартын хянал­тын улсын байцаагч Ц.Цэр­­маагаас тодрууллаа.

-Шалгалтад хичнээн аж ахуйн нэгж хамрагдсан бэ?
-Нийслэлийн мэргэжлийн хяналтын дарга, Улаанбаатар хотын ерөнхий менежерын хамтран баталсан удир­дамжийн дагуу бид нар Баян­зүрх дүүргийн нийтийн эзэмш­лийн зам, талбай дээр үйл ажиллагаа явуулдаг нийт 42 аж ахуйн нэгж, иргэний үйл ажиллагаанд хяналт, шалгалт хийлээ.

-Ямар ямар зөрчил илэрсэн бэ?
-Иймэрхүү шалгалт жи­лийн жилд явагддаг, гардаг зөрчлүүд нь ч нийтлэг байдаг. Шалгалтын үеэр хамгийн наад зах нь айрагны гэрүүд гэхэд л зөвхөн айраг зарах зөвшөөрөлтэй атлаа цагаан идээ, мах зэрэг өөр төрлийн бүтээгдэхүүн худалдаж бай­на. Гэтэл тэр махыг хэн хаана чанаад, яаж  хадгалж байгаа юм.  Хадгалах нөхцөл нь ч шаардлага хангахгүй. Тэгэхээр бид зөвхөн гэрээнд тусгагдсан зүйлээ зараач ээ гэдэг шаардлагыг тавьсан.

Саяны шалгалтад айраг худалдан борлуулж буй есөн гэр хамрагдсан. Бид айраг­наас нь дээж авч Нийслэлийн мэргэжлийн хяналтын газрын төв лабораторид шинжил­гээнд өгсөн. Шинжилгээнд хамрагдсан айрагны 20 хувь нь эрүүл ахуйн шаардлага хангахгүй байна гэсэн дүн гарлаа. Айрагны гэрүүдэд хамгийн наад зах нь угаалга, цэвэрлэгээ, ариутгал хан­галт­гүй хийгддэг.  Уг нь угаалга цэвэрлэгээг гурван дамж­лагаар хийх ёстой. Гэтэл айрагны гэрүүдэд ийм угаалга дамжлага хийх бо­ломж­гүй. Тиймээс  манай зүгээс нэг удаагийн аяга, тавгаар үйлчлэх,  үйлчилгээ хийж буй хүмүүсээ эрүүл мэндийн үзлэг, шинжилгээнд хамруулаач гэдэг шаардлага тавьсан.

Бас нэг хүндрэлтэй асуу­дал нь ахуйн хог хаягдал болон хэрэглээнээс ялгарсан бохир ус байдаг. Энэ асууд­лыг яаж шийдсэн талаар ч давхар шалгалт хийсэн

Ер нь ил задгай жимс, жимсгэнэ, хүнсний ногоо нь хадгалалт, борлуулалтын эрүүл ахуйн шаардлага хан­гаг­­даагүй. Ихэнхи нь ямар ч шинжилгээ, баталгаагүй бү­тээг­дэхүүнийг авчраад зарж байна. Гэтэл ном дүрмээрээ бол Мэргэжлийн хяналтын байгууллагаар чанар, аюул­гүй байдлын шаардлага хан­га­сан гэсэн  дүгнэлт гаргуул­сан байх ёстой. Гэтэл ма­най­хан хаана, хэн үйлдвэрлээд байгаа нь мэдэгдэхгүй, хаяг шошго нь тодорхой бус барааг зардаг. Дээр нь  өдөржин халуун наранд гар дээрээс худалдаалж байгаа хүнсний бүтээгдэхүүн ямар байх нь ойлгомжтой.

Мэдээж бид нар хүнсний аюулгүй байдлын шаардлага хангахгүй байна гээд орхи­чих­доггүй. Албан шаардлагыг хүмүүст хүргүүлдэг.

Энэ шалгалтад шорлог хийж зардаг таван аж ахуйн нэгж хамрагдсан. Эдгээр аж ахуйн нэгж нь харьцангуй ардаа гал тогоотой газрууд байлаа.

Харин манайхны нэг технологийн алдаа байдаг. Махаа модны галан дээр шарахад гадна талыг түлээд, дотор тал нь дутуу болдог. Тэгээд иргэдээс түүхий шор­лог өглөө гэсэн гомдол ирдэг. Уг нь технологи нь бол  модны нүүрсний цогон дээр болгох хэрэгтэй .Энэ нь махыг зөө­лөн, жигд болгодог. 

-Зөрчил гаргасан газ­руу­дад ямар хариуцлага тооцдог вэ?
-Эхний удаа зөвлөгөө өгнө. Дараа нь албан ёсоор бичгээр зохих шаардлага хүргүүлнэ. Хэрвээ үнэхээр Мэргэжлийн хяналтын улсын байцаагчын тавьсан шаард­ла­гыг биелүүлж чадахгүй бол бид үйл ажиллагааг нь зог­соох хүртэл арга хэмжээ авна.

-Урьд жилүүдтэй харь­цуу­лахад ямар байна вэ?
-Жил болгон л явагддаг шалгалт. Ядахдаа дүүрэг мааань гэрээ хийхдээ  наад захын  шаардлагуудыг тавьж, хэрэгжүүлэх ёстой. Ер нь ийм үйл ажиллагаа явуулах гэж байгаа аж ахуйн нэгж, иргэ­дийг хүлээж аваад наад захын шаардлагуудыг хангасан байх ёстой гэдгийг урьдчилан сургалт семинар маягаар өгөх нь зүйтэй. Хүн болгон дээр очиж ярих биш болж өгвөл бүгдийг нь цуглуулаад заавар зөвөлгөө өгөх нь илүү үр дүнтэй байх.

Эх сурвалж: Өдрийн сонин